Зрабіць Дзяды непрацоўным днём – даць магчымасць ушанаваць продкаў!

Куды
Савет Міністраў Рэспублікі Беларусь, Адміністрацыя Прэзідэнта Рэспублікі Беларусь

Прозвішча, імя, імя па бацьку (Абавязкова)

Адрас (Абавязкова)

E - mail заяўніка (Абавязкова)

Калектыўны зварот

Тэкст звароту (Абавязкова)
Дзяды - восеньскія дні памінання продкаў. У гэты час у большасці рэгіёнаў Беларусі людзі прыходзяць на могілкі, каб прыбраць іх і ўшанаваць памяць продкаў. Ад 1991 да 1996 года Дзяды былі непрацоўным днём. Гэта давала магчымасць грамадзянам Беларусі выканаць свой абавязак сумлення і памяці, ушанаваць продкаў, падбаць пра добраўпарадкаванне могілак. У сувязі з працэсамі міграцыі і ўрбанізацыі, а таксама пасля аварыі на ЧАЭС і масавага адсялення з зоны радыяцыйнага забруджвання большасць грамадзян Беларусі не жывуць стала ў тых мясцінах, дзе нарадзіліся і дзе пахаваныя іх бацькі і дзяды. Тысячам беларусаў выкананню абавязку сумлення па добраўпарадкаванню могілак і ўшанаванню памяці перашкаджае той факт, што дні 1 і 2 лістапада з'яўляюцца працоўнымі ў календары. У каталіцкай традыцыі 1 лістапада - Урачыстасць усіх святых, 2 лістапада - Дзень задушны, калі памінаюць усіх памерлых. Штогод каталіцкія біскупы ў сваіх пасланнях нагадваюць вернікам (а такіх у Беларусі, па афіцыйных дадзеных, не менш за 1,4 мільёну, ці каля 15% насельніцтва, а ў Гродненскай вобласці - 60% насельніцтва) пра абавязак наведаць могілкі. Гэтую норму цяжка рэалізаваць у сучасных умовах адсутнасці непрацоўнага дню 1 ці 2 лістапада. Праваслаўныя вернікі маюць свой дзень памяці продкаў - Радаўніцу, якая афіцыйна з'яўляецца выходным. Больш таго, кіраўніцтва дзяржавы для зручнасці грамадзян перад Радаўніцай пераносіць працоўныя дні, каб праваслаўным грамадзянам Беларусі было зручна выканаць свае абавязкі па прыборцы магілаў і ўшанаванню продкаў. Католікі, як і многія беларусы, што адзначаюць Дзяды 1 і 2 лістапада па старажытнай традыцыі, пазбаўлены такой магчымасці, што мае падставы гаварыць аб дыскрымінацыі дадзенай дэнамінацыі. Нагадваем, што забеспячэнне рэалізацыі правоў грамадзян Рэспублікі Беларусь на свабоду сумлення і веравызнання з'яўляецца адным з ключавых элементаў забеспячэння нацыянальнай бяспекі. Асновы для рэалізацыі правоў грамадзян у галіне свабоды сумлення і веравызнання закладзены ў Канстытуцыі Рэспублікі Беларусь і Законе «Аб свабодзе сумлення і рэлігійных арганізацыях». Норма артыкулу 31 Канстытуцыі гарантуе свабоду сумлення і тлумачыць яе як права самастойна вызначаць свае адносіны да рэлігіі; аднаму або сумесна з іншымі вызнаваць любую рэлігію або не вызнаваць ніякай. Свабода сумлення з'яўляецца найважнейшым фундаментальным правам чалавека. У мэтах дасягнення сацыяльнай справядлівасці ў грамадстве, захавання добразычлівых адносінаў перад прадстаўнікамі розных канфесій, рэалізацыі канстытуцыйнага права на свабоду сумлення, навядзення парадку на зямлі шляхам добраўпарадкавання могілак, выхавання моладзі ў духу пашаны да продкаў патрабуем зрабіць 1 і 2 лістапада нерабочымі днямі ў Беларусі, пачынаючы з 2019 года, і замацаваць гэта адпаведным нарматыўна-прававым актам. Нагадваем, што рашэнне аб устанаўленні дзяржаўных свят і святочных дзён, наданні адпаведнай падзеі статусу дзяржаўнага свята прымаецца Прэзідэнтам Рэспублікі Беларусь. Праект такога рашэння ўносіцца ў агульным парадку, устаноўленым для прадстаўлення на разгляд Прэзідэнта Рэспублікі Беларусь праектаў актаў Прэзідэнта Рэспублікі Беларусь. Да праекта прыкладаецца матываванае абгрунтаванне неабходнасці яго прыняцця. Прапануем Савету Міністраў сумесна з прадстаўнікамі апарату Упаўнаважанага па справах рэлігій і нацыянальнасцяў, а таксама прадстаўнікамі Каталіцкага Касцёлу ў Беларусі распрацаваць матываванае абгрунтаванне неабходнасці прыняцця зменаў у каляндар дзяржаўных святаў і выходных дзён. Адказ патрабуем даць заяўнікам у адпаведнасці з законам «Аб зваротах грамадзян».